Urkunde Nr. 4616 aus Band VII

Seite im UB:

402-406

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Zunftakten und Zunftregister [Acte şi registre de breaslă] (Inventar 33), Nr. 503 (Zunftbuch der Hermannstädter Schneider Vol. II), pag. 3-10.

Druckvorlage:

nach Original

Abdruck als:

Volltext

Sprache:

Deutsch

---

4616

1485 Die Hermannstädter Schneiderzunft gibt sich Satzungen.

[S. 403] 1485

In dem namen gottis herren amen. Noch Crist gepurt tausent vierhundert in dem fumff vnd achczigistem jar an des heyligen ewangelisten sant Marx tag haben dy vorsichtigen vnd weyssen czechmeister der czech der sneyder mit namen Crauss Peter, Jacob Sneyder von Mvdwysch, Swartz, Steffan vnd Mathes Vngeleich lassen beschreyben mit der ersamer vnd weysser meister willen der gantzer czech ire gewonheyt vnd gerechtikeit von dem ersten: Wyssentlich sey es euch lieben herren dy meyster jung vnd alt wyr thun euch zw wyssen vnssers hantwercks gewonheyt.
Item das erst das kayn sneyder ader scherer auss der czech vnd kayn ledig knecht nit in der Hermanstat sneyderwerck ader schererwerck arbetten sal vnd wir auch kaynen auff nemen, her sal dan das hantwerck ee bewerren.
Item wer sych seczt wyder der czechen gewonheyt¹⁾ vnd wolt nicht straffung auff nemen noch dem her verdint vnd wbertretten hat.
Und dar czu nemen wir zw hylff burgermeister, richter vnd burger vnd stroffen yn mit sampt vnsser herren hylff noch vnsser czechen gewonheyt.
Item das haben wir gehabt von vnsseren eldern.
Item darvmb pyt wir euch ersamen herren burgermeister, richter vnd burger, das ir vns helfft behalden in vnsser czechen gewonheit¹⁾ als hy vnd her noch begriffen ist.
Item das ist der czechen gewonheyt wen eyn gesell kumpt gewandert in dy Hermanstat der erst meyster der in an redt zw arbetten, dem sal der selbig gesell arbetten²⁾ der meyster sey jung ader alt welcher gesell ader jung das nit thwt, der thwt wider vnsser czechen gewonheyt.
Item kayn mester sal kaynen ler jungen auff nemen zw leren das hantwerck es sey sneyder oder³⁾ scherer³⁾ dy weyl her eynen anderen jungen in der werckstat hat der dy czeyt nit ausgedynt hat.
Item welcher meyster sych in vnsser czech seczen wil, das wol wir wyssen von wann vnd von wem her geporen ist.
Item welcher meyster in vnsser czech sytzen wyl, es sey sneyder ader³⁾ scherer³⁾, der ist schuldig nyder zw legen der czech IIII gulden, IIII pfunt wachs vnd IIII emer weyn.
Item welch meyster nycht kumbt zw der leych vnd das verseumbt, der ist schuldig der czech eyn virtel wachs.
Item pey welchem meyster das czechen verkert wirt also von mancherem meyster versempt wirt dy pen vor yder eynem⁴⁾ mester sal der selbig geben eyn fyrtel wachs durch des willen das her das verkert hat.
Item welcher meyster das czechen nit snell weg send als pald es zw im kumpt vnd lest es lygen, der selbig sal verfallen seyn dy pen do mit man⁵⁾ das czeichen auss gesent wirt sy sey gross ader cleyn an alle genod.
Item auch nemen wir kaynen auff in vnsser czech es sey meyster ader gesell, es sey dan das her vor hyn beweyst vnssers hantwercks gerechtikeyt mit der materya.
Item darnach wan eyn jung es sey sneyder ader scherer kumpt yn dy Hermanstat dy do nicht han gedynth do nit eyn czech ist als auff dorfferen, merckten ader pey hoff sneyderen, dy sal nymant halden ader arbet geben es sey dan sy haben gegeben der czech gerechtikeit als anderen haben gethun dy in der czech gelernt han.
Item ab yndert eyn gesell wer der sych verlobt ader verendert ee wan her gematericht, der ist verfallen der czech⁶⁾ gulden⁷⁾ VI.
Item welcher meyster freyt eynen knecht ee das her gematericht, der selbig mester ist der czech vorfallen 1 gulden. [S. 404] Item welcher gesell materyen wil, der sal den erberen meysteren dy dar zw gesaczt seyn darvmb das sy mü mit im han vnd vor ir verseumnyss geben eyn gulden vnd eyn besched essen noch seynem vermugen.
Item ab eyn erber meyster sturb ader ab gyng mit tod vnd das den dy fraw begeren wer von den erberen mesteren zw arbethen eyn fyrtel jar, das erlöbt man ir vnd nit lenger.
Item das ist vnsser czechen gerechtikeyt vnd gewonheyt ab ynderth eyn meyster eyn ler jungen het vnd ab das her sych wolt ab richten mit seynem meyster, das sal her nith thun an der meyster iren wyllen.
Item ab yndert eyn jung seynem meyster weck lyff vnd quem wyder es stund lang ader kurcz, der selbig iung sal seynem meyster dynen dy czeyt dy her im schuldig ist gewessen ader genug thun.
Item och wysset lieben herren das mir eyn mes lassen singen zw des heyligen kunigs sant Lasseis tag, dornoch dingt man auch eyn frey pad fur dy gancze czech.
Item den weyn den do geben dy jungen meyster vnd dy ler jungen den selbigen nützt man wo es sych gepürt pey dem thor pey dem weyer ader wo es noth thwt.
Item kayn mayster sal nit mer fayl haben an aynem schlechten dinstag wan VIII grosse stwck vnd II par hossen vnd IIII par ermell.
Item am dinstag vor pfingsten, am dinstag vor weynnachten, am dinstag noch dem geswornen montag⁸⁾ vnd dy weyl dy hochczeyt werden vor fasnacht am grossen dinstag vnd am dinstag vor ostern an den vorgenanten tagen sal kain mayster mer fayl haben wan X grosse stuck, II par hossen vnd IIII. par ermell. Welcher mer stwck auss tregt wan hy genant⁹⁾ ist von itzlichem stuck das vberig auss getragen ist eyn pfunt wachs in dy czech.
Item dy meyster mit den groen röcken swllen geleicher weyss dy saczung halden pey der ee gesprochen pwss¹⁰⁾.
Item kayn mayster sal an czwayen enden sneyderwerck fayl haben pey eynem pfunt wachs.
Item das han dy mayster gemacht VIIII ellen sal lanck seyn dy stang do man das sneyderwerck an hengt, wer dy stang lenger wird han, das wirt dy bwss seyn II pfunt wachs vnd II emer weyn.
Item kayn meyster sal nit mer halden wan¹¹⁾ I knecht vnd aynen jungen, es wer dan das vbrig gesynd wer so mag einer halden mit der mayster willen mer.
Item kayn mayster sal keynem gesellen dem aller pesten geben mer wan X wochen I gulden, welcher mayster das vbertreten wirt, der sal in dy czech geben zw bwss fur I gulden wachs.
Item des selben geleichen sal keyn gesell mer foderen von seynem herren wan X wochen I gulden welcher gesell das vbertreten wirt, der sal in dy czech geben zw bwss den meysteren fur I gulden wachs.
Item welcher gesell der sich an das gepott nit keren wirt vnd wold auff stan von seynem herren in eynem freffel vnd wolt zw eynem anderen mayster gan, der sal nit arbet han pey vns weder jar noch tag.
Item welcher gesell auff stet seynem herren auss dem dinst vier wochen vor ostern, vier wochen vor pfingsten, vier wochen vor weynnachten, dem selben gesellen sal seyn herr kayn lon nit geben vnd sal hy pey vns nit gefwdert werden.
Item welcher gesell im selber macht eyn feyertag in der wochen es sey am montag ader am dinstag ader an was tag es sey an dy heylig feyertag, der sal das wochen lon nit warten seyn von seynem herren.
Item welcher meyster gibt seinem knecht eyn wochen lonn, der eyn tag gefeyert hat in der selben wochen der im den tag selbest gemacht hat, der selb mayster sal zw bwss vorfallen seyn in dy czech fur I gulden wachs. [S. 405]

Item welcher gesell zw sant Lasla tag wan wir meyster dy mes lassen singen wirt feyeren, der sal das wochen lon verloren haben, wan warvmb den gesworen montag hab wir in erlaubt zw feyeren fur den tag.
Item wysset lieben mayster von der gantzer czech das wir mit eyner eyntracht gemacht haben vns vnd vnsseren noch komen das aller meyster kynder sneyder vnd³⁾ scherer³⁾ swllen haben gantze czech¹²⁾.
Item von allem gewant sal man dy sydel von czwayen tuch breyten¹³⁾ machen vnt nyt weniger vnd wer sy anders wirt machen, dem wird man das cleyd in dy czech nemen. .
Item zw den frawen menteln von Loblischem gewant sal man nemen IIII tuch breyt vnten vnd oben II tuch breyt.
Item von Mechlischem gewant auch IIII tuch breyt vnten vnd oben II tuch breyt.
Item von Fwlfurtischem Gewant auch als vil.
Item von halb Pernischem gewant IIII tuch breyt vntten vnd oben II tuch pret vnd II stwck darczw.
Item auss eynem gantzen halb Pernischen tuch sal mon machen drey frawen mentel vnd sal nichsnit darvon machen ader nemen pey der bwss dy darauff gesaczt ist fur 1 gulden wachs.
Item von Echischem gewant IIII 1/2 tuch pret vntten vnd II 1/2 oben.
Item von Nurmberger gewant IIII tuch pret vntten vnd oben II tuch pret vnd II 1/2 oben.
Item von Speyer gewant¹⁴⁾ IIII tuch pret vntten vnd oben II tuch pret vnd 1 stwck.
Item wer das vbertretten wirt an welchem stuck es sey der ist vorfallen in dy czech fur 1 gulden wachs.
Item eyn yder mester ist frey zw czesehen eyner dem anderen yn seynem sneyderwerck, her sey jung ader alt an allen czoren; vnd wer wider das wirt seyn, der sal zw bwss vorfallen seyn in dy czech fur 1 gulden wachs.
Item auch sal keyn meyster keynen hincken jungen auff nemen zw lerung das hantwerk.
Item auch welcher mester in vnsser czech sytzen wyl das wol wir wyssen, ab her seynem 1er meister genug hab gethun vmb seyne ler jar.
Item welcher meyster gibt eynem anderen mesteren zw arbeten der nit in der czech ist, der selbig meyster sal der czech entperren also lang piss her der meyster willen wider begreyfft¹⁵⁾ ader von einem solchen mester kleder kaufft.
Item welcher meyster eynen jungen dingt, der ist der czech schuldig IIII gulden, IIII pfunt wachs vnd IIII emer weyn nyderzw legen vnd der selb jung sal geben seynem meyster IIII gulden vnd sal im dynnen vier jar; vnd welcher mester dy IIII gulden von dem jungen nit nympt, so sal dy czech das von im nemen.
Item¹⁶⁾ zw welchem meyster gewant getragen wirt zw machen cleyder vnd der selbig meyster das gewant ab czechent mit der kreyden ader sneyt das gewant vnd darnoch der man ader fraw das wider fodert durch neyd ader durch an haldung willen vnd tregt es zw eynem anderen meyster vnd lest es do machen, der selbig meister sal verfallen sein in dy czech den mach lon. Item auch sal kein mester kainen knecht nit halden der nit gantz czech gerechtigkeit hat geben in die czech sunder welcher mester halb czech gerechtikeit hat geben, der selb mester mach einen jungen ader knaben halden vnd darnoch wann her der czech gerechtikeit gibt so mag her gesind halden als es gewonheit in der czech ist. [S. 406]

Item welcher mester dem anderen gewannt auss den henden kaufft vnd wolt es wider vnsseren mesteren verkauffen vnd wolt gewynn von in nemen, es sey in der stat ader auff den iarmerckten, der selb sal sein bwss czwyschen vns nit wyssen.
Item welcher gesell seines herren hauss vnert ader beschemt, der selbig sal kein eer noch fudernyss czwyschen vns nit haben.


1) Von hier bis Satzende mit anderer Tinte. [2x]^{^}
2) Hierauf gestrichen he. ^{^}
3) Später getilgt. [6x]^{^}
4) Vorlage eymen. ^{^}
5) Hierauf gestrichen cze.^{^}
6) Hierauf gestrichen II.^{^}
7) Hierauf gestrichen IIII.^{^}
8) Hierauf gestrichen am dinstag vor weynachten.^{^}
9) Hierauf gestrichen hat. ^{^}
10) Hierauf überschrieben N B, am Rand Kreuz und I B.^{^}
11) Hierauf gestrichen II.^{^}
12) Hierauf gestrichen zweinhalb Zeilen.^{^}
13) Hierauf gestrichen vnd.^{^}
14) Hierauf mit anderer Tinte über der Zeile nachgetragen vnd Pressler gewant.^{^}
15) Hierauf mit kleinerer Schrift nachgetragen.^{^}
16) Dieser Absatz in kalligraphischer Schrift.^{^}