Urkunde Nr. 4430 aus Band VII

Seite im UB:

283-285^a)

Heute in:

Klausenburg, Staatsarchiv [Direcţia Judeţeană Cluj a Arhivele Naţionale ale Romȃniei]

Heutige Signatur:

Stadt Klausenburg [Primăria Oraşului Cluj] (Inventar 1ff.), Priv. S. 4.

Druckvorlage:

nach Original

Abdruck als:

Volltext

Sprache:

Latein

---

4430

Ofen 1481 August 21 König Matthias verbietet den Salzgrafen, die Bewohner von Klausenburg am freien Salzhandel zu hindern. [S. 284]

Nos Mathias dei gratia rex Hungariae, Bohemiae et cetera memoriae commendamus¹⁾ tenore praesentium significantes quibus expedit universis quod fideles nostri circumspecti Nicolaus Petri Mathiae, iudex et Ambrosius Zabo, iuratus civis civitatis Coloswariensis, maiestatis nostrae venientes in conspectum suis ac totius communitatis eiusdem civitatis nostrae personis et nominibus exposuerunt nobis in hunc modum gravi cum querela: quomodo comites camerarum salium nostrorum regalium in eorum medio constituti ipsorumque vicecomites ac homines et familiares, dum incolae ipsius loci sales quos ab ipsis camerariis nostris emunt vel quos etiam quicumque ad ipsam civitatem introducunt homines extranei ac venditioni exponunt, ab emptoribus eorundem tam ab incolis civitatis quam ab extraneis in domo et in foro, contra antiquam libertatem et consuetudinem ipsius civitatis nostrae violenter aufferent in grande praeiudicium et dampnum ipsorum oppressionemque manifestam, supplicantes humiliter maiestati nostrae ut superinde de remedio providere dignaremur opportuno. Nos itaque, qui ex debito nostri regiminis tenemur fidelium subditorum nostrorum quieto statui, utilitati et commodo providere, civesque nostros in antiquis eorum libertatibus et consuetudinibus consevare, annuimus et concessimus eisdem civibus et communitati civitatis nostrae Coloswariensis atque concedimus per praesentes, ut a modo deinceps ipsi quilibet videlicet ipsorum sales quos a camarariis nostris et de cameris salium nostrorum comparaverint²⁾ aut quibus ipsi eosdem venderent scilicet quos extranei quicumque ad ipsam civitatem introducerent, integros aut imminutos, qualescumque habeantur, iuxta dictam antiquam libertatem et consuetudinem dictae civitatis nostrae et aliis semper sub nostra regia protectione liberam emendi et vendendi tam ipsi incolae et inhabitatores civitatis quam homines extranei quicumque habeant potestatis omnimodam facultatem, sive in domibus sive in foro, contradictione comitum vel vicecomitum camararum nostrarum aut aliorum quorumcumque non obstante. Quapropter vobis fidelibus nostris comitibus dictarum camararum salium nostrorum et vices vestras gerentibus, praesentibus et futuris praesentium notitiam habituris, praesentibus districte praecipimus et mandamus, quatenus a modo in antea tam praefatis civibus et incolis dictae civitatis nostrae Coloswariensis et eorum cuilibet, quam extraneis quibuscumque sales verae camerae nostrae, quos a vobis emerint aut in civitatem ipsi extranei introduxerint, integros vel imminutos et qualescumque, mutuo inter sese et alter utri libere, pacifice et absque omni contradictione emere et sive in domibus sive in foro vendere permittere et permitti facere debeatis et eos auffere a quocquam nullatenus praesumatis gratiae nostrae sub obtentu. Alioquin commisimus fidelibus nostris magnificis vaivodis vel vicevaivodis partium nostrarum Transsilvanarum praedictarum, ut ipsi vos et quemlibet vestrum dum et quando per ipsos cives ac extraneos requisiti fuerint ad observationem huiusmodi mandati nostri per omnia gravamina vestra arcius compellant et astringant, authoritate nostra regia ipsis in hac parte specialiter attributa et iustitia mediante; secus ergo non facturi, praesentes autem quas secreti sigilli nostri appensione communiri fecimus post lecturam reddi mandamus praesentanti. Datum Budae in festo beati Bartholomei apostoli, anno domini millesimo quadringentesimo octogesimo primo, regnorum autem nostrorum anno Hungariae et cetera vigesimo quarto, Bohemiae vero tredecimo. [S. 285]

Von der Kanzlei: Ad relationem Thomae de Erdewd, praepositi Tituliensis.

Auf der Rückseite gleichzeitig: Litterae super emtionem et vendicionem salium.


a) Erster Seitenumbruch nach Kopfregest.^{^}

1) Bis hierher verlängerte Schrift.^{^}
2) Vorlage comper... ^{^}