Urkunde Nr. 4390 aus Band VII

Seite im UB:

258-259

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Sammlung Schnell II, Nr. 22.

Druckvorlage:

nach Original

Abdruck als:

Volltext

Sprache:

Deutsch

---

4390

Hermannstadt 1481 März 6 Der Kronstädter Ratsherr Petrus Beer berichtet dem Richter und Rat von Kronstadt über seine Mission nach Hermannstadt und zum siebenbürgischen Woiwoden.

[S. 259] Fursichigen ersamen hochwesyn sonnder gunnsstigen herren vnnd frewnnd. Mein gar fruntlich willig dinst sein ewr weyssheit von mir bereit voran. Lieben herren, als ich nagst von ewr weyssheit in pottschafft vnnd mit beuelh her in die Hermanstat abgefertigt pin et cetera, füg ich ewr lieb zu wissen, das die Hermenstetter ain irn gesworn purger mitsampt mir zu vnnserm herren weiden geschickt, alda wir vor sein gnaden dis nachvolgend meynung enteckt habnn. Das ersten von wegnn des wegs von der prachen, das hat vnns sin gnad nicht freyen noch zethun gestattn wellen. Des burggref halben ist vns von sin Gnaden geanntwurt worden: was gut der burggreff genommen hab, solle alles pey verlirhung seins hopts vnnd sinner gütter wirderumb gegeben werden, nach Lat siner ¹⁾ gnaden brieff. Dann von wegenn der phanndung der von Schoespurg ¹⁾, et cetera thu ich ewr weyssheit zuuernemen ²⁾ , das der burgermeister vnnd kunigsrichter von Schoespurg ¹⁾ paid pey vnnserm herrn weyden gewest vnnd sein sollicher phanndung nicht anred, sonder habnn vor sein gnaden geredt vnnd auffgenomenn, das solch phanndung von in noch den irn nicht beschechen solle et cetera. Der Walachen halben hab ich nichzit angepracht vnnd das darumb vermitten, das ich besorgt wa ²⁾ ich sollichs sin gnaden anprecht vns möchte beswerde dauon komen also, sin gnad möchte ewr weysheit pietten die Walachen lennger vff ewrn costen zehaldten ²⁾ . Min herren hie vnnd ich habnn och mit dem Jörgen Vislwanen von wegen der mawt zu Waschahl ²⁾ vor unserm herren weiden getedigt, das mer furohin deselbs kain mawt mer sein noch genommen werden sol, das wellet ewren purgern vnnd kaufflewten zu wissen thun. Lieben herren ewr weissheit hat vormals vnnsers herrn weyden canntzler ain erung mit einem teckhltuch zugesagt, das ich im nw weitter versprochen hab von wegnn der ietzigen brieff. Sollch teckhltuch für II oder III guldin wellen im vereeren vnnd erst es gesin ²⁾ mag zusennden. Die annder beuelhnus findet ewr weyssheit in den briefen die ich E. W. hiemit zu schickh. Damit seit Gott beuolhen.<fnz>

Ewr weissheit mitgesworn purger Petrus Ber ietz zu der Hermmenstatt.

Datum Cibinii feria tertia post dominicam Estomichi, anno domini et cetera octoagesimo primo.

Auf der Rückseite Adresse: Den fursichtigen, ersamen vnnd hochweisen herren, dem richter vnd gesworn purgern der statt zw Cron, meinen sonnder günsstigen liebenn herren vnnd gutten frewnden.

<fnzt>1) e über der Zeile. [3x]</fnzt> <fnzt>2) So Vorlage. [5x]</fnzt>