Urkunde Nr. 4165 aus Band VII

Seite im UB:

125-126

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

4165

Ofen 1477 Januar 9 König Matthias verbietet dem siebenbürgischen Bischof Ladislaus, das Patronatsrecht des Bistritzer Rates über Mettersdorf anzutasten.

Von der Kanzlei: Commissio propria domini regis.

Mathias dei gratia rex Hungariae, Bohemiae et cetera fideli nostro reverendo domino Ladislao electo et confirmato ecclesiae Albensis Transsilvanae salutem et gratiam. Querelam pro parte et in personis fidelium nostrorum circumspectorum iudicis et iuratorum ceterorumque civium civitatis nostrae Bistriciensis accepimus continentem, quod quamvis nos alias ipsis ius patronatus parochialis ecclesiae beati Johannis evangelistae in possessione Nagydemeter vocata constructae per dupplices literas nostras contulerimus ipsique vigore huiusmodi iuris patronatus quendam discretum presbyterum idoneum et sufficientem vacante huiusmodi plebania in ipsam ecclesiam et plebaniam elegerint et nominaverint. Tamen vos ex post quendam Bartholomeum Literatum, familiarem vestrum, cum quibusdam literis nostris in eandem plebaniam intrudi fecissetis, in praeiudicium dicti iuris patronatus praefatorum exponentium valde magnum. Supplicatum itaque est maiestati nostrae, ut eisdem superinde remedium adhibere dignaremur opportunum. Cum autem nos ipsos cives nostros in praescripto iure patronatus ipsorum prout ipsis semel contulimus non obstantibus etiam quibuscumque literis nostris in contrarium literarum nostrarum ipsis superinde praemisso modo datarum vel etiam dandarum illibate velimus conservare, nam [S. 126] neque literas cuipiam consessissemus, si prius constitisset nobis quemadmodum nunc constat de iure patronatus dictorum civium per nos eisdem literis nostris mediantibus in hac parte concesso, et si quas in contrarium concessissemus viribus omnino carituras decernimus per praesentes. Quamobrem mandamus fidelitatae vestrae harum serie firmiter aliud omnia habere nolentes, quatenus visis praesentibus praescriptos cives nostros in praefato iure patronatus ipsorum libere, quiete, pacifice tenere et conservare et quicumque per eos electus fuerit dummodo idoneus sit et persona bene merita non obstantibus quibuscumque literis nostris tacita veritate obtentis confirmare et eum impedire nullo modo praesumatis. Quoniam ut praemisimus nos ipsos cives nostros in praefato iure patronatus libere conservare volumus et nolumus aliquem alium ipsam plebaniam assequi nisi illum, quem ipsi cives nostri ex indultu et concessione iuris patronatus nostri elegerint. Secus ergo non facturi praesentibus perlectis exhibenti restitutis. Datum Budae feria quinta proxima post festum epiphaniarum domini, anno eiusdem millesimo quadringentesimo septuagesimo septimo, regnorum nostrorum Hungariae et cetera anno decimo nono, Bohemiae vero octavo.