Urkunde Nr. 1545 aus Band III

Seite im UB:

369-370 ^a)

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Original

Abdruck als:

Volltext

Sprache:

Latein

---

1545

Thorenburg 1405 September 1 Jakob Lachk, Woiwode von Siebenbürgen, spricht die Hälfte des Busser Zehntens dem Kapitel und das Viertteil dem Archidiakon von Weissenburg zu.

Nos Jacobus Lachk vaivoda Transsiluanus et comes de Zolnok memoriae commendantes significamus tenore praesentium quibus expedit universis, quod nobis die dominico proximo post festum decollationis beati Johannis baptistae¹⁾ in nostro generali colloquio una cum regni nobilibus pro negotiis regni decernendis²⁾ Tordae celebrato existentibus ibidemque uni cuique, quod suum est, iuris aequitate suadente ex officio nostro restituere ac querelantibus iustitiam impertiri cupientibus honorabiles [viri] domini Georgias Lepees praepositus et Nicolaus decanus canonici ecclesiae Transsiluanae propriis ac aliorum dominorum de capitulo eiusdem ecclesiae nominibus contra et adversus discretum virum dominum Anthonium presbyterum plebanum de Bozd ibidem personaliter comparentem coram nobis proposuerunt eo modo, quod idem dominus Anthonius presbyter medietatem decimarum in dicta villa Bozd et eius territorio provenientium dicto capitulo ac quartam partem earundem decimarum archidiacono Albensi pro tempore constituto a tempore antiquo, cuius initii memoria hominibus non occurrit, provenire consuetas et debentes a tertio anno et citra tempore videlicet disturbii regni absque omni iure occupasset occupatasque detineret et eisdem puta medietate et quarta ipsarum decimarum uteretur in praeiudicium dicti capituli ac archidiaconi et derogamen, exhibentes nobis pro huiusmodi propositionis verificatione eorumque iurium tuitione quoddam antiquum privilegium duobus sigillis iudicum delegatorum et manu publica roboratum, anno domini M^mo CCC^mo tricesimo quarto emanatum.³⁾ In cuius privilegii tenore inter cetera comperimus evidenter, medietatem dictarum decimarum ad capitulum praedictum, quartam vero ad archidiaconum de iure spectasse et pertinuisse ac spectare et pertinere. Quo audito praefatus dominus Anthonius presbyter respondit ex adverso, quod totalis decima in dicta villa Buzd et eius territorio provenire consueta ad ecclesiam suam parochialem ac rectorem eiusdem pro tempore constitutum pertineret plene et integre. Et pro tuitione suae partis produxit duos processus tertio proxime praeterito et praesenti anno in curia Romana emanatos. Ubi praefati domini praepositus et decanus amplius in eius contrarium exhibuerunt quasdam literas patentes serenissimi [S. 370] principis domini Sigismundi dei gratia incliti regis Hungariae et cetera domini nostri gratiosi sub minori sigillo eiusdem confectas cum firmissimo mandato regio inter cetera expresse declarantes, quod quia materia litis et quaestionis inter praefatum capitulum ab una et Anthonium presbyterum parte ex altera super facto praemissarum decimarum orta regia maiestas volens inter partes facere iudicium et iustitiam praefatum dominum Anthonium presbyterum, universa sua iura et literalia instrumenta si quae super facto dictarum decimarum haberet contra [et adversus] dictum capitulum coram ipsa regia maiestate producturus et exhibiturus, ad dies rogationum proxime praeteritas¹⁾ in praesentiam sui venire mandavisset, idem dictus Anthonius presbyter regiis non verens contraire censuris in contemptum decreti regiae maiestatis per ipsam alias dudum super restringendis, sopiendis et refrenandis bullis et eorum incursibus, ex quorum invalescentiis multiformibus, dum vigebant, regnum et eius incolae multimodis vexationibus, penuriis et oppressionibus subiacebant, editi et stabiliti a facie iudicii praefati domini regis se absentasset ad aliena regna pro quaerendo iure se transferendo, ideo sua regia maiestas huiusmodi iniuriam ex corde nolens non modicum memoratas decimas non alteri nisi ad usum praedicti capituli per populos seu hospites de dicta Buzd dari plene et administrari regio sub firmissimo commisisset dicto, alioquin eosdem populos seu hospites ad id cum eorum gravaminibus compelleremus et astringeremus auctoritate suae regiae maiestatis in eisdem suis literis nobis attributa mediante. Nos igitur huiuscemodi regio mandato accepto quia ex tenore praenotati antiqui privilegii ac multorum virorum nobilium nobiscum in examine ipsius causae consedentium assertione ad praenotatum capitulum medietatem, ad archidiaconum vero quartam ipsarum decimarum de iure ab antiquo ut praemissum est spectasse et pertinuisse ac spectare et pertinere, praefatumque dominum Anthonium presbyterum per suos praenotatos processus nihil novi iuris acquisivisse potuisse nobis et regni nobilibus videbatur, ipsos etiam processus idem dominus Anthonius presbyter parte adversa absente impetrasse ex certo documento perhibebatur, pro eo deum et iustitiam ferentes prae oculis ipsas medietatem decimarum capitulo praedicto, quartam vero archidiacono iuxta praemissam formam mandati regiae maiestatis decrevimus debere dari et administrari ac decernimus praesentium patrocinio mediante. Datum Thordae, in festo beati Egidii confessoris, anno domini millesimo quadringentesimo quinto.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-3 auf S. 369, 1 auf S. 370.^{^}
[S. 369]
1) August 30.^{^}
2) Vorlage: decernand [Abkürzungssstrich über letztem d].^{^}
3) Vergleiche Nr. »512.^{^}
[S. 370]
1) Mai 25 bis 27.^{^}