Urkunde Nr. 1318 aus Band III

Seite im UB:

74-76 ^a)

Heute in:

Karlsburg (Weissenburg), Batthyaneum [Biblioteca Naţională a României, Filiala Biblioteca documentară Batthyaneum, Alba Iulia]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1318

Szentimre 1394 Mai 4 Peter, Vizewoiwode von Siebenbürgen bezeugt die Übereinkunft zwischen dem Bischof und Kapitel von Weissenburg einerseits und dem Adel andererseits, betreffend die Pachtung des Zehntens und der Zehntquarten.

Nos magister Petrus filius Georgii de Wereb vicevaivoda Transsiluanus significamus tenore praesentium quibus expedit universis, quod cum in octavis festi beati Georgii martyris³⁾ plurima multitudo nobilium [S. 75] regni pro executione causarum suarum ad easdem octavas¹⁾ prorogatarum ad villam Sancti Emerici convenisset²⁾ et coram magnifico viro domino Frank vaivoda Transsiluano et nobis ibidem praesentibus per procuratorem venerabilis in Christo patris domini Demetrii episcopi Transsiluani similiter ibidem interessentis³⁾ necnon capituli eiusdem ecclesiae contra quosdam nobiles in facto occupationis indebitae et potentialis usurpationis suarum decimarum necnon etiam quartarum decimarum archidiaconalium graviter fuisset proposita querela, et super hoc mandatum regium firmissimum per suas literas ad compescendum tales usurpationes praesentatum et tandem super tali potentiaria usurpatione et occupatione seu detentione decimarum iidem nobiles per eundem dominum episcopum et suum capitulum fuissent diligenter requisiti, ut una cum domino nostro et nobis de remedio providerent opportuno, ut iidem usurpatores decimarum a talibus illicitis occupationibus cessare compellerentur, tunc iidem nobiles matura deliberatione et tractatu inter se praehabito unanimiter et concorditer responderunt, quod talibus occupatoribus et usurpatoribus decimarum nullum praestarent auxilium seu favorem, sed ut rectitudo dictaret iustitiae tales essent merito compescendi et puniendi. Verum quia quidam nobiles, qui de usurpatione decimarum accusabantur, in sui excusationem proponebant, quod easdem decimas a procuratoribus domini episcopi et capituli, qui ipsas locandi habuissent potestatem, conduxissent, et e converso procuratores praedicti idem constanter abnegabant, ideo praedicti nobiles regni una cum domino nostro vaivoda et nobis eodem domino episcopo et aliquibus dominis de capitulo consentientibus taliter ordinarunt et disposuerunt, quod quicumque nobilium seu alterius conditionis hominum decimas a domino episcopo et suo capitulo vel ab archidiaconis quartas decimales conducere voluerint vel habere, super locatione decimarum ipsarum et quartarum literas eorundem domini episcopi, capituli et archidiaconorum vel suorum procuratorum ad hoc specialiter deputatorum, potestatem locandi habentium seu cedulam recognitionis super ipsa locatione sub sigillo ipsorum recipere teneantur, ut de ipsa locatione eis facta docere possint et probare. Quicumque autem de occupatione et usurpatione decimarum vel quartarum in posterum inculparentur et per literas locationis vel chartas⁴⁾ sigillatas docere et probare non possent, tales usurpatores seu occupatores in facto potentiae, prout in praelibatis literis regalibus plenarie continetur, convincantur eo facto et per eosdem dominum vaivodam et vicevaivodam poena debitae potentiae puniantur nullo eis auxilio suffragante, ne frivolis occasionibus praetensis valeant aliqualiter excusari. Si qui vero nobiles vel alii conductores decimarum vel quartarum decimalium in terminis consuetis, in literis locationum eis ad solvendum deputatis ipsas decimas seu quartas decimatoribus persolvere recusarent, ex tunc dominus vaivoda vel⁵⁾ suus vicevaivoda pro tempore constitutus de summa pecu- [S. 76] niae in literis locationis expressae ad requisitionem decimatorum seu procuratorum praedictorum satisfactionem impendere cum iudicio trium marcarum super possessiones non solventium extorquendarum deberent et tenerentur absque strepitu iudicii et litigionario processu aliquali, prout praemissa omnia nobiles regni conformiter et unanimiter statuerunt et decreverunt firmiter observanda. Datum in loco praenotato, quarto die octavarum sancti Georgii praedictarum, anno domini miliesimo trecentesimo nonagesimo quarto.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 3 auf S. 74 (1 zu voranstehender Urkunde Nr. »1316), 1-5 auf S. 75.^{^}
[S. 74]
3) Mai 1.^{^}
[S. 75]
1) Mai 1.^{^}
2) Vorlage: convenissent.^{^}
3) Vorlage: interessent [über Wortende Abkürzungsstrich].^{^}
4) Vorlage: quartas.^{^}
5) Über der Zeile nachgetragen.^{^}