Urkunde Nr. 1314 aus Band III

Seite im UB:

64-67 ^a)

Heute in:

Hermannstadt, Staatsarchiv [Direcţia Judeţeană Sibiu a Arhivelor Naţionale ale Romȃniei]

Heutige Signatur:

Urkundensammlung [Colecţia de documente medievale], Serie U. I (Inventar 25), Nr. 67.

Druckvorlage:

nach Original

Abdruck als:

Volltext

Sprache:

Latein

---

1314

Mediasch 1393 Dezember 8 Frank, Woiwode von Siebenbürgen, verbietet die an den ihm unterstehenden Abgabenstellen gegen die Leute [S. 65] aus den sieben Stühlen verübten Ungerechtigkeiten, betreffend die Einhebung von Strafgeld, die Wegnahme der Waren, die Besteuerung der Reisenden, des Reisegepäcks, der Lebensmittel, der Gold- und Silbervorräte und des Geldes, sowie der Geschenke für den König und die Königin.

Nos Ffrank vaivoda Transsiluanus et comes de Zolnuk memoriae commendantes tenore praesentium significamus quibus expedit universis, quod providus vir Georgius filius Petri civis de Cybinio sua et aliorum universorum civium de eadem necnon in septem sedibus Saxonicalibus et in villis ad easdem spectantibus commorantium in personis in nostram veniens praesentiam nobis significavit dolorose, quod cum ipsi aut aliqui ex eisdem ad provincias aut aliqua regni climata in acquisitione suorum victuum necessariorum proficiscerentur, iidem¹⁾ per nonnullos nostros teloniatores seu tributarios varias iniurias violentasque rerum et bonorum eorum ablationes ac illicitas suarum personarum dehonestationes quibusdam sinistris novitatibus per ipsos tributarios diversimode introductis creberrime et incompassibiliter paterentur in eo primarie, quod cum ipsi cives et hospites aut aliqui ex eisdem simul ut puta vel singillatim ad loca dictorum tributorum pervenientes equum vel equos ipsorum ad columnam seu statuam signum tributariae solutionis decernentem vel ad parietem seu domum tributariam contingenter alligaverint, ex tunc tributarii super eos quadraginta denarios, aut si etiam iidem cives et hospites vel aliqui ex ipsis armis eorum necessariis more solito muniti in domum et praesentiam ipsorum tributariorum praetextu solutionis tributi intrantes accesserint dicta arma eorum foris non relinquendo, similiter quadraginta denarios super eos exigerent. Vel si etiam iidem cives et hospites aut aliqui ex ipsis cum eorum curribus et rebus mercimonialibus ad loca dictorum tributorum pervenerint et equi eorum ipsos currus trahentes eandem statuam seu columnam sive domum tributariam aliquantulum pertransierint et aliquantisper post tergum reliquerint,²⁾ aut si ipsi cum dictis eorum curribus et rebus in hospitio descenderint et de eodem hospitio ad dictos tributarios accesserint iustum et verum tributum persoluturi, vel si aliqui ex eisdem civibus cum dictis rebus eorum mercimonialibus ad dicta loca tributorum pergentes certum hominem ipsorum a campo propter celeriorem expeditionem praemissae tributariae solutionis antemitterent et de ipsis rebus eorum iustum tributum persolvi faciendo in ipsisque locis dictorum tributorum non pausando pertransierint, praefati tributarii illico calumnia eis imposita asserentes, ipsos cum eorum rebus praedictis de dictorum tributorum locis fugitive et clandestine recessisse, ipsos rebus eorum praemissis prorsus spoliarent, damnificarent et [S. 66] creberrime disturbarent. Cumque etiam praefati cives et hospites aut nuncii seu ambasiatores eorum aliqui ad regiam vel reginalem maiestates in factis et necessitatibus ipsorum transire voluerint aut cum curribus lectisternia et victualium ipsorum necessaria deferentibus vel sine curribus et absque rerum mercimonialium delationibus solum super equis ad aliquas partes regni profecti aliqua eorum facta et negotia certa prosecuturi exstiterint, ex tunc praefati tributarii super ipsos et a curribus ac equis ipsorum necnon clenodiis seu muneribus regiae vel reginali maiestatibus per ipsos portandis seu exhibendis necnon pecunia ac auro et argento ipsorum hinc inde intra ambitum regni ad eorum negotiationes necessario per eos deferendis tributariam exactionem peterent, reciperent et indefesse¹⁾ extorquerent in ipsorum ingens detrimentum non modicum et iacturam, deprecantes²⁾ nos super his condignum et opportunum remedium gratiose ipsis elargiri. Nos itaque ipsius Georgii filii Petri civis civitatis Cybiniensis et personis quibus supra petitionibus³⁾ inclinati praefatas novitates ac omnes erroneas et abusivas seu damnabiles consuetudines in dicti tributi receptione per ipsos tributarios ut est antelatum introductas cassamus, annullamus et in irritum revocamus. Quare vobis universis comitibus, castellanis, nobilibus et eorum officialibus tributa tam in terris quam super aquis ubique intra ambitum regni partis Transsiluanae sub vaivodatu nostro in nostris districtibus, comitatibus et partinentiis tenentibus et habentibus firmo sub edicto praecipientes mandamus, quatenus a modo et deinceps super dictos cives et hospites pro eo, ut iidem equum vel equos ipsorum ad praefatam columnam, parietem vel domum tributariam contingenter alligaverint, et ex eo, ut ipsi aut aliqui ex ipsis praemissis eorum armis muniti in eorundem tributariorum domum et praesentiam accesserint, praefatos singulos quadraginta denarios dicti tributarii recipere non praesumant, et etiam pro eo, ut ipsi cives et hospites cum curribus et rebus ipsorum ad loca dictorum tributorum dum pervenerint et equi ipsorum dictos currus trahentes, eandem domum vel columnam⁴⁾ tributariam aliquantisper pertranseuntes⁵⁾ post tergum reliquerint,⁶⁾ ac etiam ex eo, ut si ipsi cum dictis eorum curribus et rebus in hospitio descenderint et deinde ad solvendum tributum ad dictos tributarios accesserint tributum persoluturi, pro eo etiam, ut si aliqui ex eisdem civibus cum dictis rebus ipsorum mercimonialibus ad loca tributorum pergentes a campo dictum hominem ipsorum ad solvendum tributum antemitterent et de ipsis rebus ipsorum iustum tributum persolvi faciendo, in locis dictorum tributorum non pausando pertransierint, iam dicti tributarii praefatos cives praemissis eorum rebus et bonis spoliare aut damnificare ipsos seu disturbare nullatenus valeant neque possint, nec ab ipsis ad regiam vel reginalem maiestates transeuntibus aut ad aliquas regni partes sine rebus mercimonialibus equitantibus et eorum curribus dicta ipsorum lectisternia seu victuatium genera continentibus necnon [S. 67] auro et argento et pecunia eorum praetextu ut praemisimus negotiationis ipsorum intra ambitum regni hunc et hanc portandis per eosdem muneribusque regiae et reginali maiestatibus per eos deferendis iuxta nostrum decretum et nostram commissionem, tributariam exactionem memorati tributarii petere aut exigere non debeant neque valeant modo aliquali, sed eosdem semper quitos sinant pertransire de locis dictorum tributorum et pacificos novitate et impedimento absque omni, harum nostrarum testimonio literarum. Datum in civitate Megyes, feria secunda videlicet in festo conceptionis virginis gloriosae, anno domini M^mo CCC^mo LXXXX^mo tertio.


a) Erster Seitenumbruch im Kopfregest. Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-2 auf S. 65, 1-6 auf S. 66.^{^}
[S. 65]
1) Vorlage: iidemque.^{^}
2) Vorlage: relinquerint.^{^}
[S. 66]
1) Vorlage: indesse.^{^}
2) Scilicet: praefati cives et hospites.^{^}
3) Scilicet: in sua et personis quibus supra nobis porrectis petitionibus.^{^}
4) Vorlage: calumnam.^{^}
5) Vorlage: pertransientes.^{^}
6) Vorlage: relinquerint.^{^}