Urkunde Nr. 1277 aus Band III

Seite im UB:

30-32 ^a)

Heute in:

Budapest, Ungarisches Landesarchiv [Magyar Országos Levéltár]

Druckvorlage:

nach Original

Abdruck als:

Volltext

Sprache:

Latein

---

1277

Klausenburg 1391 April 28 König Sigmund gestattet, dass Gregor, Sohn Johanns von Bethlen, und Peter, Sohn Johanns von Malmkrog, einerseits sowie Ladislaus, Sohn Emerichs von Eppeschdorf, andererseits sich gegenseitig beerben.

Von der Kanzlei: Propria commissio domini regis. [S. 31]

Nos Sigismundus dei gratia rex Hungariae, Dalmaciae, Croaciae et cetera necnon marchio Brandemburgensis et cetera memoriae commendantes tenore praesentium significamus quibus expedit universis, quod fideles nostri dilecti nobiles et strenui viri magistri Gregorius filius Johannis filii Jacobi de Betlem et Petrus filius Johannis de Almakerek ab una, parte vero ex altera magister Ladislaus filius Emerici de Ebesfalu nobilis comitatus de Kukullew in nostrae maiestatis praesentia personaliter constituti per partes utrasque culmini nostro humiliter expositum exstitit et supplicatum, quod quia ipsi Gregorius, Petrus et Ladislaus ab olim se mutua sinceraque caritate pertractavissent amicitiisque et nonnullis ceteris gratitudinibus roborassent, quamquam linea consanguineitatis iidem Gregorius et Petrus ipsi Ladislao attinere non dignoscerentur, desiderarent tamen ab intimis partes utraeque, si benignus atque gratiosus ad id noster accederet consensus, se ipsos¹⁾ in fratres condivisionales assumere et acceptare adeo scilicet, ut decessa parte una ab hac luce absqne heredum solatio universae possessiones et portiones possessionariae talis partis defunctae in alteram partem superviventem iure successorio devolvi, redigi valerent et redundare. Nos itaque humillimis supplicationibus per partes praemissas nobis ut praescribitur oblatis clementer exauditis pariter et admissis, recensitis quoque fidelitatibus et fidelium obsequiorum praeclaris meritis, quibus memorati fideles nostri dilecti nobiles et strenui viri Gregorius filius Johannis filii Jacobi de Bethlen et Petrus filius Johannis de Almakerek maiestati nostrae sub diversitate locorum et temporum non parcendo eorum personis et rebus studuerunt et anhelant toto conamine complacere in futurum, attendentes nihilominus sinceritatis zelum et fidei inviolabilem constantiam, quam iidem Gregorius et Petrus ad sacrum regni Hungariae diadema et ad nostram celsitudinem a dudum inconcusse gesserunt et gerere non desistunt de praesenti. Praemissorum igitur intuitu et ut iidem nostris obsequiis ferventius queant intendere, ipsis Gregorio de Bethlem et Petro de Almakerek matura praehabita deliberatione de certa maiestatis nostrae scientia et plenitudine regiae potestatis hanc singularis praerogativae gratiam gratiose annuentes faciendam duximus et fecimus praesentium per vigorem, ut in casu, quo volente deo caeli, cuius nutu reguntur omnia, annotatus Ladislaus filius Emerici de Ebesfalu ab hac luce sine heredum solatio decesserit, ex tunc possessiones eiusdem Ladislai filii Emerici videlicet Ebesfalu ante fata necnon Sent Iwan, Ernye, Hondorf, Goganfalua, Monyoros et Jedych nuncupatae in dicto comitatu de Kukullew existentes ac aliae universae possessiones et portiones possessionariae eiusdem Ladislai filii Emerici ubilibet situatae et cuiusvis nominis vocabulo appellatae ad dictos Gregorium de Beethlen et Petrum de Almakerek eorumque heredes pleno iure successorio et perennali redigi debeant et devolvi per eosdem Gregorium et Petrum et heredes eorundem ex praesenti nostra annuentia et gratia perpetuo possidendae. In eventum autem, quo iam dicti Gregorius et Petrus annotato Ladislao filio Emerici adhuc in humanis agenti absque prolium seu heredum solatio de hoc medio fuerint sublati, ex tunc [S. 32] volumus et annuimus, ut possessiones et portiones possessionariae quaelibet eorundem Gregorii et Petri ubilibet existentes in dictum Ladislaum filium Emerici similiter iure successorio redigi valeant et redundari per ipsum Ladislaum tenendae et perpetuo possidendae, dantes et conferentes novae nostrae donationis titulo praefatas possessiones et portiones possessionarias praenotati Ladislai filii Emerici et omne ius quod eodem Ladislao decedente in possessionibus et portionibus possessionariis eiusdem Ladislai nostram concerneret maiestatem annotatis Gregorio et Petro ipsorumque heredibus, possessiones vero et portiones possessionarias dictorum Gregorii et Petri praelibato Ladislao filio Emerici in casibus praeallegatis per partes utrasque perpetuo possidendas, tenendas pariter et habendas salvis duntaxat iuribus Saxonum nostrorum sedium de Megyes et de Selk, si quae in praefatis possessionibus saepe dicti Ladislai filii Emerici eosdem concernunt, et nihilominus iure aliorum quorumvis nostrorum fidelium in praemissis semper salvis, harum nostrarum testimonio literarum. Quas dum nobis in specie reportatae fuerint in formam nostri privilegii redigi faciemus. Datum in Coloswar, feria sexta proxima post festum beati Georgii martyris, anno domini millesimo trecentesimo nonagesimo primo.

Unter dem Siegel Kanzleibemerkung.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 2 auf S. 30 (1 zu voranstehender Urkunde -- 2 in Siegelbeschreibung), 1 auf S. 31.^{^}
[S. 30]
2) AR verschränkt.^{^}
[S. 31]
1) Vorlage: ipsas.^{^}