Urkunde Nr. 1267 aus Band III

Seite im UB:

13-16 ^a)

Heute in:

Kronstadt, Staatsarchiv [Direcţia Judeţeană Braşov a Arhivele Naţionale ale Romȃniei]

Heutige Signatur:

Fond 1: Stadt Kronstadt [Primaria Municipiului Braşov], Privilegiensammlung (Colecţia privilegii) Nr. 14.

Druckvorlage:

nach Original

Abdruck als:

Volltext

Sprache:

Latein

---

1267

1391 März 29 König Sigmund verbietet die an den königlichen und sonstigen Abgabenstellen gegen die Leute aus dem Kronstädter Distrikt verübten Ungerechtigkeiten, betreffend die Einhebung von Strafgeld, die Wegnahme der Waren, die Besteuerung der Reisenden, des Reisegepäcks, der Lebensmittel, der Gold- und Silbervorräte und des Geldes, sowie der Geschenke für den König und die Königin.

Von der Kanzlei: Propria commissio domini regis.

Sigismundus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae Bulgariaeque rex ac marchio Brandemburgensis, sacri Romani imperii archicamararius necnon Bohemiae et Lucemburgensis heres omnibus Christi fidelibus tam praesentibus quam futuris praesentium notitiam habituris salutem in omnium salvatore. Justitia et [S. 14] iudicium iuxta saluberrimam insignitaeque praepollentem supernae dispensationis provisionem praeparant sedem regis et sunt regalis solii validissimum et sollidissimum fundamentum, civilis rei gratia Dauid rex pius omniumque prophetarum eximius orabat cordis ex desiderio sui iudicium regi et iustitiam filio regis dari. Proinde ad universorum notitiam tam praesentium quam futurorum harum serie volumus pervenire, quod fideles nostri iudex, iurati consules seniores et universi cives nostri de Brassow partium nostrarum Transsiluanarum missis et in conspectum nostrae celsitudinis destinatis providis viris Johanne iudice, Jacobo iurato, Nicolao filio Herbortii cive et altero Nicolao filio Jacobi hospite de Bochfalua ambasiatoribus et consociis ipsorum nostrae per eosdem maiestati significarunt dolorose, quod cum ipsi ac ceteri hospites et incolae villarum ad dietam Brassow iugiter et ab antiquo spectantium aut aliqui ex eisdem ad provincias aut aliqua regni nostri climata in acquisitione suorum victuum necessariorum proficiscerentur, sicut per nonnullos nostros sic non minus aliorum tributarios seu teloniatores varias iniurias violentasque rerum et bonorum eorum ablationes ac illicitas suarum personarum dehonestationes quibusdam sinistris novitatibus per ipsos tributarios diversimode introductis creberrime et incompassibiliter paterentur in eo primarie, quod cum ipsi fideles cives et hospites nostri aut aliqui ex eisdem simul ut puta vel singillatim ad loca dictorum tributorum pervenientes equum vel equos ipsorum ad columnam seu statuam signum tributariae solutionis decernentem vel ad parietem seu domum tributariam contingenter alligaverint, ex tunc tributarii super eos quadraginta denarios, aut si etiam iidem cives et hospites nostri vel aliqui ex ipsis armis eorum necessariis more solito muniti in domum et praesentiam ipsorum tributariorum praetextu solutionis tributi intrantes accesserint dicta arma eorum foris non relinquendo, similiter quadraginta denarios super eos exigerent, reciperent et incompassibiliter extorquerent. Vel si etiam iidem cives et hospites nostri aut aliqui ex ipsis cum eorum curribus et rebus mercimonialibus ad loca dictorum tributorum pervenerint et equi eorum ipsos currus trahentes eandem statuam seu columnam sive domum tributariam aliquantulum pertransierint et aliquantisper post tergum reliquerint¹⁾ aut si ipsi cum dictis eorum curribus et rebus in hospitio descenderint et ad solvendum tributum de eodem hospitio ad dictos tributarios accesserint iustum et verum tributum persoluturi vel si aliqui ex eisdem civibus nostris cum dictis rebus mercimonialibus transire consueti cum eisdem ad dicta loca tributorum pergentes a campo hominem ipsorum propter celeriorem expeditionem praemissae tributariae solutionis antemitterent et de ipsis rebus eorum iustum tributum persolvi faciendo in ipsis locis dictorum tributorum non pausando pertransierint, praefati tributarii mox calumnia eis imposita asserentes ipsos cum eorum rebus praedictis de praedictorum tributorum locis fugitive et clandestine recessisse, ipsos rebus eorum praedictis spoliarent, damnificarent et creberrime disturbarent. Cumque etiam praefati cives et hospites nostri aut nuncii seu ambasiatores eorum aliqui ad nostram vel ad reginalem maiestates in factis et [S. 15] necessitatibus ipsorum venire voluerint aut cum curribus lectisternia et victualium eorum necessaria deferentibus vel sine curribus et absque rerum mercimonialium delatione super equis ad aliquas partes regni nostri profecti aliqua eorum facta et certa negotia prosecuturi exstiterint, ex tunc praefati tributarii super ipsis et a curribus ac equis ipsorum necnon clenodiis seu muneribus nostrae vel reginali maiestatibus per ipsos portandis et exhibendis necnon pecunia ac auro et argento ipsorum hinc inde intra ambitum regni nostri ad eorum negotiationes necessario per ipsos deferendis tributariam exactionem peterent, reciperent et indefesse extorquerent in ipsorum ingens detrimentum non modicum et iacturam, deprecantes super his per nostram maiestatem condignum et opportunum remedium gratiose ipsis elargiri. Nos igitur ex officio nostri regii regiminis incumbenti attendentes divinae providentiam maiestatis, quae cuncta perpetua ratione regit et gubernat, principatus et dominationes in orbe terrarum ad hoc produxisse, ut sinistras novitates per quempiam suis fidelibus incolis quoquomodo inflictas penitus evulsas habeat et¹⁾ relegatas nationesque sibi subioctas in viam pacis et iustitiae, quae summa virtus est, dirigat et pacifice custodiat, pro eo nos commodis et utilitatibus dictorum fidelium civium et hospitum nostrorum ac heredum et posteritatum eorundem invigilare cupientes praefatas omnes erroneas novitates et abusivas ac damnabiles consuetudines in dicti tributi receptione per ipsos tributarios ut est antelatum introductas una cum eisdem praelatis et baronibus nostris cassamus, annullamus²⁾ et in irritum perpetuo revocamus mandantes et nostro firmissimo regio edicto praecipientes universis praelatis, baronibus, comitibus, castellanis, nobilibus et eorum officialibus tributa tam in terris quam super aquis ubique intra ambitum regni nostri tenentibus et habentibus nostrisque et eorundem tributariis praesentibus pariter et futuris praesentium notitiam habituris, quatenus a modo in antea super dictos cives et hospites nostros pro eo, ut iidem equum vel equos ipsorum ad praefatam columnam³⁾ seu parietem vel domum tributariam contingenter alligaverint, et ex eo ut ipsi aut aliqui ex ipsis praemissis eorum armis muniti in eorundem tributariorum praesentiam accesserint, praefatos singulos quadraginta denarios dicti tributarii accipere non praesumant, et etiam pro eo ut ipsi cives et hospites nostri cum curribus et rebus ipsorum ad loca dictorum tributorum dum pervenerint et equi ipsorum dictos currus trahentes eandem columnam³⁾ vel domum tributariam aliquantisper pertranseuntes⁴⁾ post tergum reliquerint5), ac etiam ex eo ut si ipsi cum dictis eorum curribus et rebus in hospitio descenderint et deinde ad solvendum tributum ad dictos tributarios accesserint tributum persoluturi, pro eo etiam ut si aliqui ex eisdem civibus nostris cum dictis rebus ipsorum mercimonialibus ad loca tributorum pergentes a campo dictum hominem ipsorum ad solvendum tributum antemitterent et de ipsis rebus eorum iustum [S. 16] tributum persolvi faciendo, in locis dictorum tributorum non pausando pertransierint, iam dicti tributarii praefatos fideles cives nostros praemissis eorum rebus et bonis spoliare aut damnificare ipsos seu disturbare nullatenus valeant neque possint, nec ab ipsis ad nostram vel reginalem maiestates venientibus aut ad aliquas regni nostri partes sine rebus mercimonialibus equitantibus et eorum curribus dicta ipsorum lectisternia seu victualium genera continentibus necnon auro et argento ac pecunia eorum praetextu uti praemisimus negotiationis ipsorum intra ambitum regni nostri hunc et hanc per eos portandis muneribusque nostrae vel reginali maiestatibus per eos deferendis iuxta nostrae maiestatis decretum temporibus in perpetuis illibate duraturum tributariam exactionem memorati tributarii petere aut exigere non debeant neque valeant modo aliquali, sed eos ae ipsorum successores iuxta praemissum nostrae maiestatis decretum et statutum temporibus semper in perpetuis quitos sinant pertransire de locis dictorum tributorum et pacificos novitate et impedimento sine omni. In cuius rei memoriam firmitatemque perpetuam praesentes eisdem concessimus literas nostras privilegiales pendentis et authentici sigilli nostri duplicis munimine roboratas. Datum per manus reverendissimi in Christo patris et domini, domini Johannis archiepiscopi ecclesiae Strigoniensis locique eiusdem comitis perpetui ac aulae nostrae et ipsius reginalis maiestatum eximii cancellarii dilecti nostri et fidelis, anno domini M^mo CCC^mo nonagesimo primo, quarto Kalendas mensis Aprilis, regni autem nostri anno quinto.


a) Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1 auf S. 14, 1-5 auf S. 15.^{^}
[S. 14]
1) Vorlage: relinquerint.^{^}
[S. 15]
1) Fehlt in der Vorlage.^{^}
2) Vorlage: anolamus.^{^}
3) Vorlage: calumpnam [2x].^{^}
4) Vorlage: pertransientes.^{^}
5) Vorlage: relinquerint.^{^}