Urkunde Nr. 1048 aus Band II

Seite im UB:

442-443

Heute in:

Vatikanstadt, Vatikanisches Archiv [Archivum Secretum Apostolicum Vaticanum, Archivio Segreto Vaticano]

Druckvorlage:

nach anderem Urkundenbuch mit Quellennachweis

Abdruck als:

Volltext

Sprache:

Latein

---

1048

Avignon [1376] Mai 5 Papst Gregor XI. ernennt den Bistritzer Pfarrer Peter zum Bischof von Waitzen.

Gregorius episcopus et cetera dilecto filio Petro electo Wachiensi salutem et cetera. Apostolatus officium quamquam insufficientibus meritis nobis ex alto commissum, quo ecclesiarum omnium regimini praesidemus, utiliter exequi coadiuvante domino cupientes, solliciti corde reddimur et solertes, ut cum de ipsarum regiminibus agitur committendis tales eis in pastores praeficere studeamus, qui commissum sibi gregem dominicum sciant non solum doctrina verbi sed exemplo boni operis informare commissasque sibi ecclesias in statu pacifico et tranquillo velint et valeant duce domino [S. 443] salubriter regere et feliciter gubernare. Nuper siquidem ecclesia Wachiensi ex eo pastoris solatio destituta, quod nos venerabilem fratrem nostrum Johannem Jauriensem tunc Wachiensem episcopum licet absentem a vinculo, quo ipsi ecclesiae Wachiensi, cui tunc praeerat, tenebatur, de fratrum nostrorum consilio et apostolicae potestatis plenitudine absolventes ipsum ad ecclesiam Jauriensem tunc vacantem duximus auctoritate apostolica transferendum praeficiendo ipsum eidem Jauriensi ecclesiae in episcopum et pastorem, nos attendentes, quod nullus praeter nos hac vice de provisione ipsius Wachiensis ecclesiae se intromittere potuit neque potest pro eo, quod nos diu ante huiusmodi vacationem dictae Wachiensis ecclesiae provisiones omnium cathedralium ecclesiarum tunc vacantium et in posterum vacaturarum per translationes per nos in posterum faciendas de praelatis earum ubilibet constitutis ad alias cathedrales ecclesias tunc vacantes et in antea vacaturas ordinationi et dispositioni nostrae duximus reservandas decernendo ex tunc irritum et inane, si secus super his per quoscumque quavis auctoritate scienter vel ignoranter contingeret attemptari, ac ad provisionem ipsius Wachiensis ecclesiae celerem et felicem, ne longae vacationis exponeretur incommodis, paternis et sollicitis studiis intendentes post deliberationem, quam de praeficiendo eidem Wachiensi ecclesiae personam utilem et etiam fructuosam cum dictis fratribus habuimus diligentem, demum ad te rectorem parochialis ecclesiae sancti Nicolai de Bestercia¹⁾ Transilvanae diocesis in presbyteratus ordine constitutum, literarum scientia praeditum, vitae ac morum honestate decorum, in spiritualibus providum et in temporalibus circumspectum aliisque virtutum donis, prout fide dignorum accepimus testimonio, insignitum, pro quo etiam dilecti filii capitulum dictae Wachiensis ecclesiae per eorum patentes literas nobis super hoc humiliter supplicarunt, direximus oculos nostrae mentis. Quibus omnibus debita meditatione pensatis de persona tua nobis et eisdem fratribus ob dictorum tuorum exigentiam meritoram accepta eidem Wachiensi ecclesiae de dictorum fratrum consilio auctoritate apostolica providemus teque illi praeficimus in episcopum et pastorem, curam et administrationem ipsius Wachiensis ecclesiae tibi in spiritualibus et temporalibus plenarie committendo in illo, qui dat gratias et largitur praemia confidentes, quod praefata Wachiensis ecclesia sub tuo felici regimine gratia tibi assistente divina prospere et salubriter dirigetur ac grata in eisdem spiritualibus et temporalibus suscipiet incrementa. Jugum igitur domini tuis impositum humeris prompta devotione suscipiens curam et administrationem praedictas sic exercere studeas sollicite, fideliter et prudenter, quod ipsa Wachiensis ecclesia gubernatori provido et fructuoso administratori gaudeat se commissam, tuque praeter aeternae retributionis praemium nostram benevolentiam ac sedis apostolicae gratiam uberius consequi merearis. Datum Avinione, III. Nonas Maii, pontificatus nostri anno sexto.

In eodem modo capitulo, clero et populo, vasallis ecclesiae Wachiensis et archiepiscopo Strigoniensi. [S. 444]


1) Vorlage: Rzstercia.^{^}