Urkunde Nr. 886 aus Band II

Seite im UB:

281-283 ^a)

Druckvorlage:

nach Original

Abdruck als:

Volltext

Sprache:

Latein

---

886

Bistritz 1367 Januar 6 Der Bistritzer Distrikt setzt Bestimmungen fest, betreffend die Weineinfuhr, den Ankauf von Weingärten, den Weinausschank, die Rechte, Arbeiten und Waarenpreise der Handwerker, die Aufnahme von Handwerkslehrlingen und von zugewanderten Meistern und das zwischen Winzern und Handwerkern zur Einhaltung dieser Bestimmungen vereinbarte Bündnis. [S. 282]

Sicut numquam est stabile fluens tempus sed defluit, sic quoque cum ipso tempore fluunt et defluunt actiones, ne labatur ergo cum tempore quod modo geritur aeternari debet memoria literarum. Cognoscant igitur tam praesentes quam posteri, quibus opportunum nosse fuerit, quod nos . . iurati senioresque cives necnon universitas incolarum civitatis Bistriciensis et ad eandem pertinentis provinciae post diutinas dissensionis ac discordiae plurimas inter nos habitas materias propter adductiones extraneorum vinorum de possessionibus nobilium seu de quibuscumque partibus extra Bistriciensem districtum constitutis in verae quietationis ac unionis normam convenimus et coadunati sumus ordinariasque constitutiones fecimus et facimus, quas inviolabiliter perpetuis temporibus volumus per nos nostrosque successores observari. Primo volumus et placet indifferenter nobis omnibus, quod annorum singulis in¹⁾ revolutionibus a novis sive a vindemiis usque festum beati Jacobi apostoli, quod messis tempore colitur,²⁾ nullus civium nullusque provincialium et generaliter nullus hominum de nobilium possessionibus vel aliunde quibuscumque de partibus extranea vina praesumat adducere in civitatem memoratam vel districtum, sed tantum civibus vel aliis quibuslibet hominibus vineas extra metas civitatis vel eiusdem districtus habentibus facultas conceditur et admittitur vina ipsorum de vineis eorum propriis adducendi sed non plura. Si qui vero temerariae praesumptionis ausibus indurati intra primitum vindemiarum tempus et beati Jacobi apostoli festum²⁾ aliqua vina praesumpserint adducere, tunc vinum, quod adductum fuerit, cum equo meliore vel bove de curru auferetur ab eisdem necnon ad meliorationem civitatis vel villae quo perductum fuerit conservetur. Volumus etiam, quod nullus civitatensis vel provincialis plures debeat praeter habitas extra Bistriciensem districtum vineas comparare. Insuper adiicimus, quod seniores civitatis singulis annorum revolutionibus constitutiones ac statuta facere debebunt cauponibus vel aliis vina propinare volentibus, pro quanto per veram mensuram sua vina propinabunt. Si qui vero dicta statuta civium transgressi fuerint et quoties excesserint, meritoriis poenis ac condignis birsagiis punientur. Item volumus et placet nobis omnibus, quod unum quodque opus mechanicum sive parvum sive magnum sit in antiquo iure suo debeat permanere. Quibus etiam mechanicis seniores civitatis constitutiones ac statuta facient, quibus mediantibus uni cuique laboribus eorum poterunt et pretio rationabiliter ac decenter obviare. Qui quidem mechanici pueros honestorum hominum suscipient seu suscipere debent erudiendos pro competenti pretio, sicut ordinari poterit, nec honestorum debent hominum pueros refutare sed amicabiliter erudire. Ceterum quod homines honesti cuiuscumque sint operis mechanici causa stabilitatis ac mansionis in ipsam [S. 283] civitatem subintrare cum singulis taxarum censuumque solutionibus volentes intromitti debent, quemadmodum temporibus antiquis est consuetum. Praeterea vinitores cum mechanicis talibus sunt astricti confoederationibus, quod simul stabunt contra quoslibet ordinationes praetactas volentes irritare sic, quod vinitores mechanicos et e contra mechanici praenotatos vinitores nullatenus derelinquent. Praemissis etiam omnibus adiicimus, quod omnis habens vineas extra Bistriciensem districtum licite vina suis in propriis putata seu collecta vineis et adducta post festum beati Georgii martyris¹⁾ singulis annis poterit propinare. Ne igitur ordinationes seu coadunationes praemissae possint irritari aliquibus calumniis in posterum per quospiam, praesentibus ambo sigilla scilicet civitatis et provinciae duximus appendenda pro firmitate sempiterna. Datum Bistriciae, in festo epiphaniarum domini, anno eiusdem millesimo CCC^{o c)} sexagesimo septimo.


a) Seitenumbruch nach Kopfregest. Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-2 auf S. 282, 1 auf s. 283 (2 zu nachfolgender Urkunde).^{^}
b) UB II, Tafel I bildet die Siegel der vorliegenden Urkunde ab, Beschreibung nach den jeweils ältesten Belegen Nr. »885.^{^}
c) Die hochgestellten Buchstaben nach den Zahlzeichen sind in diesem Band des gedruckten Urkundenbuches differenziert gesetzt, hier nach den Zahlzeichen.^{^}
[S. 282]
1) Über der Zeile nachgetragen.^{^}
2) Juli 25 [2x].^{^}
[S. 283]
1) April 24.^{^}