Urkunde Nr. 415 aus Band I

Seite im UB:

381-383

Heute in:

Budapest, Ungarisches Landesarchiv [Magyar Országos Levéltár]

Heutige Signatur:

DL (Diplomatikai Léveltár) Nr. 2234.

Druckvorlage:

nach Einschaltung (Insert)

Abdruck als:

Volltext

Sprache:

Latein

---

415

1324 März 25 König Karl widerruft die früher ertheilten Eximirungen von der königlichen Gerichtsbarkeit und überträgt die Ausübung dieser dem Woiwoden Thomas wie dessen Nachfolgern im Amt.

[S. 382] Karolus dei gratia Hungariae, Dalmaciae, Croaciae, Ramae, Seruiae, Galliciae, Lodomeriae, Comaniae Bulgariaeque rex, princeps Sallernitanus et honoris ac montis sancti Angeli dominus omnibus Christi fidelibus praesentibus et futuris notitiam praesentium habituris salutem in omnium salvatore. Ad universorum notitiam tenore praesentium volumus pervenire, quod licet nos eo necessitatis nostrae tempore, quo gubernaculum regni nostri ad manus nostras regias nondum plene devenerat per nefandissimos infidelium nostrorum processus coacti nobis providere de remedio opportuno quosdam de partibus Transsiluanis, quorum petitionibus de via necessitate debebamus inclinari, a iudicio et iurisdictione vaivodae Transsiluani pro tempore constituti eximentes, nostro tantum iudicio duxerimus reservandos. Quia tamen favente eo, cuius est terra et plenitudo eius, pleno regimini regni nostri in omni sui parte infidelium nostrorum insultibus prorsus evitatis iam feliciter praesidemus, iustitiam cuilibet quemadmodum ex officio nobis incumbenti tenemur reddere cupientes, quia etiam magnificum virum Thomam vaivodam Transsiluanum et comitem de Zonuk dilectum et fidelem nostrum, quem nos propter laudabilium¹⁾ suarum fidelitatum praeclara merita ad assistendum iugiter regio lateri nostro prae aliis nostris fidelibus elegeramus et ad continuas preces et instantias subiectivas hominum Transsiluanorum fidelium nostrorum velut modestum fide constantem et pacis amatorem in vaivodam praefecimus Transsiluanum, omnem tranquillitatem et observantiam iustitiae in medio eorundem invenimus exercere, prout hoc ex relatione ipsorum Transsiluanorum et probabilibus documentis exinde datis colligitur evidenter, universas gratias nostras exemptionis et literas exemptionales huiusmodi gratias continentes quibuslibet hominibus partis Transsiluanae concessas revocamus, et omnes causas occupationum possessionum et alias quascumque arduas et infimas per praefatum Thomam vaivodam et suos successores vaivodas Transsiluanos pro tempore constituendos, ne per aliquas retractiones a suo iudicio vel ademptiones gratiarum vaivodatui derogetur, sicut vaivodae antiquis temporibus progenitorum nostrorum quondam illustrium regum Hungariae iudicabant, ex nunc in posterum habita cum baronibus nostris deliberatione praematura perpetuo decrevimus iudicandas et auctoritate praesentium debito fine decidendas, exceptis dumtaxat causis collationum possessionum infidelium nostrorum per nos factarum usque modo et etiam iniuriis ablationum pecuniarum Transsiluanis per homines alterius partis regni nostri vel eisdem per Transsiluanos irrogatis, quas fore sopitas volumus et inanes. Quapropter volumus et vaivodae Transsiluano nunc constituto et constituendo in futurum regio edicto praecipimus per praesentes, quatenus universas causas sicut arduas sic infimas in praedictis Transsiluanis partibus emergendas et suscitandas iudicare et discutere debeat auctoritate nostra regia sibi praesentibus delegata et concessa. In cuius rei memoriam perpetuamque firmitatem praesentes concessimus literas nostras privilegiales novi et authentici sigilli nostri duplicis munimine roboratas. Datum per manus discreti viri magistri Andreae lectoris ecclesiae Quinqueecclesiensis, aulae nostrae vicecancellarii dilecti et fidelis nostri, anno domini M^o. CCC^o. XX^mo. quarto, octavo Kalendas [S. 383] Aprilis, regni autem nostri anno similiter Xmo. quarto. Venerabilibus in Christo patribus dominis Bolezlao Strigoniensi et fratre Ladislao Colocensi archiepiscopis, Johanne Nytriensi, Benedicto Chanadiensi, Georgio Syrmiensi, fratre Petro Boznensi, Nicolao Jauriensi, Ladislao Quinqueecclesiensi, Iwanka Waradiensi, Andrea Transsiluano, Herrico Vesprimiensi et Chanadino Agriensi ecclesiarum episcopis, ecclesias dei feliciter gubernantibus. Magnificis viris Phylippo palatino, comite de Scepus et de Vyuar ac iudice Comanorum, Demetrio magistro tavernicorum nostrorum, comite Bachiensi et Trinchyniensi, Lamperto iudice curiae nostrae, comite Chanadiensi et Nytriensi, praedicto Thoma vaivoda Transsiluano et comite de Zonuk, Nicolao bano totius Sclauoniae, Paulo bano de Machou, comite Sirmiensi, de Wolko et de Budrug, Mykch magistro tavernicorum dominae reginae, carissimae consortis nostrae, comite de Sarus et de Zemlino, Deseu iudice curiae eiusdem dominae reginae, Blasio magistro agasonum nostrorum, Dyonisio magistro dapiferorum nostrorum et Nicolao comite Posoniensi aliisque quam pluribus regni nostri comitatus tenentibus et honores.


1) Vorlage: ladabilium.^{^}