Urkunde Nr. 1731 aus Band III

Seite im UB:

592-594 ^a)

Heute in:

Klausenburg, Filiale des Erzbischöflichen Archivs [Arhiva Arhidiecezei Romano Catolice de Alba Iulia si arhiva statusului Romano Catolic din Transilvania, Filiala Cluj]

Druckvorlage:

nach Einschaltung (Insert)

Abdruck als:

Volltext

Sprache:

Latein

---

1731

Weissenburg 1414 März 5 Stephan, Bischof von Siebenbürgen, fällt in der Streitsache zwischen der Stadt Klausenburg und dem Klausenburger Pleban Cristannus den Urteilsspruch, betreffend die dem genannten Pleban beziehungsweise dessen Nachfolgern im Pfarramt hinsichtlich elf Messen obliegenden Verpflichtungen. [S. 593]

Nos Stephanus dei et apostolicae sedis gratia episcopus Transsiluanus notum facimus quibus expedit universis praesentium per tenorem, quod constitutis in nostri praesentia providis et honestis viris Laurencio iudice, Valentino de Borsa et Mathia dicto Belen civibus ac hospitibus civitatis Cluswar ab una parte, ab alia vero honorabili viro magistro Cristanno¹⁾ ecclesiae nostrae canonico et plebano de praedicta Coloswar annotati iudex et hospites suis ac universorum civium iuratorum et hospitum suorum nominibus et in personis contra et adversus praefatum magistrum Cristannum plebanum ipsorum egerunt proponendo, quod quamquam praefatus magister Cristannus cum undecim missis votivis et specialibus modo et forma infra declarandis in sua parochia celebrandis, decantandis et legendis super certis introitibus ac hereditatibus puta vineis et similibus ex Christi fidelium pia et salutari dispositione perpetuo fundatis et stabilitis, prout in sua²⁾ electione ad plebanatum dictae civitatis Coloswar spopondisset, assumpsisset et promisisset, teneretur et obligaretur, tamenque³⁾ praefatus magister Cristannus plebanus quasdam ex eisdem missis observare et celebrari facere recusaret. Quibus perceptis quia annotatus magister Cristannus plebanus ad nostram seriosam requisitionem praedictas undecim missas constanti voto⁴⁾ et proposito irrefragabili a modo et deinceps se observaturum et celebrari facturum resumptis et repetitis vicibus recognoscebat, confitebatur et asserebat, nos igitur pia consideratione ac iusto humanitatis arbitrio cultum divini nominis in ecclesia dei augeri potius archimandricali nostro officio expostulante cupientes quam diminui, auditis partium propositionibus et responsis commisimus, pronunciavimus⁵⁾ et decrevimus iudicantes immo committimus et sententionaliter pronunciamus in his scriptis, ut⁶⁾ praenominatus magister Cristannus modernus plebanus et sui successores in futurum constituendi praedictas⁷⁾ undecim missas cum debitis et solitis⁶⁾ solennitatibus ac cerimoniis hoc ordine absque aliquali negligentia temporibus perpetuis teneantur facere celebrari et observari, videlicet missa beatae Mariae virginis singulis feriis cum capellanis, in festivitatibus vero cum scholaribus decantetur, tempore medio missa beati Michaelis archangeli sub silentio celebretur, summa missa cum cantu scholarium et alia missa sub silentio peragatur. In ecclesia sancti Petri in ipsa civitate Coloswar constructa quotidie una missa legatur, in capella sanctae Mariae Magdalenae singulis secundis feriis missa defunctorum cum capellanis decantetur, aliis diebus [S. 594] sub silentio celebretur, in altari sanctorum omnium una missa de sancta Anna, alia diebus singulis sub silentio compleatur, in altari sanctae Katherinae cunctis diebus Lunae missa defunctorum cum capellanis decantetur, aliis diebus singulis sub silentio perficiatur, missa in ara corporis Christi feriis quartis cum fratribus confraternitatis dicti altaris cum vocum modulamine, aliis diebus singulis sub silentio erit officianda, item missa mane diluculo diebus singulis in ecclesia parochiali dictae civitatis peragatur et celebretur. In cuius rei testimonium ac robur perpetuae firmitatis praesentes¹⁾ nostras concessimus literas privilegiales pendentis et anularis sigilli nostri munimine roboratas. Datum Albae, feria secunda proxima post dominicam Reminiscere, anno domini M CCCC^mo XIIII^to.


a) Seitenumbruch nach Kopfregest. Die Fußnoten wurden in diesem Band des UB jeweils seitenweise gezählt. Auf die vorliegende Urkunde entfallen: 1-7 auf S. 593, 1 auf S. 594.^{^}
[S. 593]
1) r über der Zeile nachgetragen. ^{^}
2) Hierauf durchgestrichen: ol.^{^}
3) Vorlage: tamen quia.^{^}
4) Vorlage: votu.^{^}
5) Vorlage: pronunciamus.^{^}
6) Von ut bis einschliesslich solitis unterhalb des Textes nachgetragen. [2x]^{^}
7) Über der Zeile nachgetragen. ^{^}
[S. 594]
1) Vorlage: praesentas.^{^}